Háhyrningur strandaður við Þórshöfn

Háhyrningur strandaði innarlega í höfninni við ósinn við hafnarlækinn við Þórshöfn á Langanesi fyrr í kvöld. Ákveðið hefur verið að láta dýrið liggja, að sögn Steinars Þórs Snorrasonar, lögregluvarðstjóra á Þórshöfn, sem segir ekki væsa um það þar sem nú sé háflóð. Varasamt geti verið að koma of nálægt háhyrningum, því þeir geti verið grimmir.

Háhyrningurinn er, að sögn Steinars, 5-6 metra langur. Talsverður fjöldi fólks er nú samankominn til að sjá dýrið og björgunarsveitin Hafliði er komin á björgunarbát sínum, Jóni Kr., og kannar aðstæður. 

Matvælastofnun hefur verið látin vita af strandi háhyrningsins og ekki hefur verið tekin ákvörðun um hvort lögregla muni vakta hann í nótt, að sögn Steinars. 

Að sögn sjónarvotts syndir háhyrningurinn upp við hafnarkantinn og björgunarsveitin fylgist grannt með honum.