Meiri fiskur fer úr landi óunninn

Af allri útfluttri ýsu á fyrri helmingi þessa árs voru 17,6% fersk og óunnin. Eykst hlutfallið um rúmlega 100% miðað við sama tímabil fyrir ári. Útflutningur á óunnum þorski til Bretlands jókst um 18% á sama tíma, samkvæmt greiningu ráðgjafarfyrirtækisins Sea Data Center.

Niðurstöðurnar eru sláandi og sýna svart á hvítu ógnvænlega þróun sem varað hefur verið við um nokkurt skeið, segir Arnar Atlason, formaður Samtaka fiskframleiðenda og -útflytjenda.

Í umfjöllun um mál þetta í Morgunblaðinu í dag segir Kristján Þór Júlíusson, sjávarútvegs- og landbúnaðarráðherra, það ekki einfalt að setja hömlur á viðskipti með sjávarafurðir. „En við þurfum að skoða þetta.“ Segist hann talsmaður þess að reyna eigi að vinna sem mest af fiskinum hér heima. Jens Garðar Helgason, formaður Samtaka fyrirtækja í sjávarútvegi, segir að eðli máls samkvæmt leiti menn allra leiða til þess að hagræða, enda sé samkeppnin hörð á alþjóðlegum markaði með sjávarfang. Kostnaður hér hafi hækkað skarpt. Það sé mikil áskorun að halda því forskoti sem Íslendingar hafa.