Vistvænni prótín frá fiskeldi

Laxeldisfyrirtæki eru í fimm af tíu efstu sætunum í alþjóðlegri úttekt Coller FAIRR á prótínvísitölu ársins 2019. Í rannsókninni er mældur árangur í sjálfbærni 60 stærstu prótínframleiðenda heims sem samtals framleiða 18% alls prótíns.

Vísitalan endurspeglar hvernig stærstu matvælaframleiðendur heims standa sig í ýmsum áhættuþáttum sem tengjast sjálfbærni. Rannsóknin nær til kjötframleiðenda, mjólkurafurða og sjávarafurða.

Stærsta laxeldisfyrirtæki heims, MOWI í Noreg, er í fyrsta sæti í ár og er laxeldi þeirra sjálfbærasta prótínframleiðsla heims samkvæmt vísitölunni. Þar á eftir er laxeldi Lerøy sem er í 2. sæti, en Lerøy var efst á listanum árið 2018. Færeyska laxeldið Bakkafrost er í 3. sæti og norsku laxeldisfyrirtækin Grieg Seafood í 6. sæti og Salmar í 9. sæti.

Bent er á í skýrslu Coller FAIRR að fiskeldisafurðir eru almennt taldar sjálfbærari en önnur framleiðsla, þrátt fyrir að nýjar rannsóknir bendi til þess að eldislax hafi í sumum tilfellum meiri loftslagsáhrif en framleiðsla kjúklingaafurða.

Einnig er tekið fram að 87% af losun gróðurhúsalofttegunda fiskeldis megi rekja til fóðurs. Jafnframt hefur ekkert fiskeldisfyrirtækjanna sem úttektin nær til sett sér markmið um að draga úr losun sem myndast í virðiskeðjunni (e. Scope-3 emmission reduction target).

Niðurstöðurnar sýna þó að norska fiskeldið er framarlega í framleiðslu á vistvænu prótíni.

• Blogga um frétt