Fullyrða að nýju kerin séu betri

„Við notum meira efni í veggina á kerunum sem gera þau sterkari og einangrunin er betri en þau sem eru í íslensku kerunum þannig að þau eru varmaheldari og halda kælingunni betur. Þetta eru betri ker,“ fullyrðir Óli Björn Ólafsson, sölu- og markaðsstjóri IP Containers, um ný fiskiker sem fyrirtækið hefur þróað og sett á markað. Hann segir um íslenska hönnun að ræða og að hægt sé að stafla kerunum á eða undir hin hefðbundnu sæplasts- eða borgarplasts-ker.

„Íslensku fiskikerin eru íslensk uppfinning og voru fundin upp af Guðna Þórðarsyni stjórnanda Borgarplasts fyrir um þrjátíu árum og íslensku kerin hafa alltaf verið framleidd á Íslandi, en þessi eru framleidd í Kína,“ útskýrir Óli Björn sem tekur sérstaklega fram að framleiðslustaðurinn sé ekki þess valdandi að um minni gæði sé að ræða.

„Þetta er mjög erfiður bransi. Fólk í sjávarútvegi er mjög íhaldssamt,“ segir Óli Björn sem þó kveðst ekki óttast það að fara inn á þennan tiltölulega sérhæfða markað. Þá sé fyrirtækið í óðaönn að kynna þessi nýju ker.