Vísar til afkomu þegar spurt er um skatta

„Það er alveg rétt að það er kvartað undan of háum sköttum, en ég bendi þá á það að afkoman er svipuð og á síðasta ári. Hún er að batna og ég vona að það verði framhald á því,“ segir Kristján Þór Júlíusson sjávarútvegsráðherra í samtali við 200 mílur er hann er inntur álits á gagnrýni Heiðrúnar Lindar Marteinsdóttur, framkvæmdastjóra Samtaka fyrirtækja í sjávarútvegi, í garð stjórnvalda.

Í fyrra var hagnaður fyrirtækja í sjávarútvegi 27 milljarðar króna sem er um það bil það sama og árið 2017, er hagnaðurinn það ár minnsti hagnaður greinarinnar frá árinu 2009, að því er fram kom í kynningu úr gagnagrunni Deloitte á sjávarútvegsdeginum í Hörpu í morgun. Þar kom einnig fram að tekjur greinarinnar hafi verið 247 milljarðar í fyrra sem er nokkuð meira en árið á undan. þegar þær voru 225 milljarðar króna.

Frétt af mbl.is

Áherslum stjórnvalda verður að breyta

Í setningarræðu sinni á sjávarútvegsdeginum spurði Heiðrún Lind hverjar áherslur stjórnvalda væru í sjávarútvegi nú þegar þrengdi að og vísaði hún síðan til hækkunar ýmissa skatta sem lagðir væru á greinina.

„Ég bendi nú bara á það að við höfum verið að vinna í ýmsum málum tengdum sjávarútvegi á þessum tveimur árum sem ég er búinn að vera í ráðuneytinu. Við höfum endurskoðað grunninn undir veiðigjöldin, þannig að það er fyrirsjáanlegra. Við höfum sett makríl inn í aflamark, sem hlýtur að vera stór kostur með allan fyrirsjáanleika og arðsemi af þeim veiðum,“ segir Kristján Þór.

Frétt af mbl.is

Gjaldhækkanir þrátt fyrir minni losun

• Blogga um frétt