Haustvertíð gengur vel og frysting í fullum gangi

Síldarfrysting er nú í fullum gangi hjá Ísfélagi Vestmannaeyja á Þórshöfn og er þar unnið á vöktum allan sólarhringinn. Vel gekk að manna vertíðina, en alls starfa nú um 120 manns við frystingu og í bræðslunni.

Vertíðin hófst í fyrstu viku ágúst, sem er nokkuð seinna en venjulega, og var makrílfrysting fram í miðjan september en þá tók síldin við. Ekki náðist að klára allan makrílkvóta Ísfélagsins og er töluvert eftir af síldarkvótanum.

„Hér á Þórshöfn er nú búið að taka á móti um fimmtán þúsund tonnum af síld og makríl það sem af er vertíð,“ sagði Siggeir Stefánsson, framleiðslustjóri hjá Ísfélaginu, „það er tiltölulega stutt á miðin núna en skipin hafa verið á veiðum nálægt Borgarfirði eystri svo það er aðeins um átta tíma sigling hingað í löndun.“

Aðallega er verið að flaka og „flapsa“ síldina, en þar er átt við að síldarflökin hanga saman á roðinu, ólíkt þeirri flökuðu sem er roðlaus, og er misjafnt eftir mörkuðum eftir hverju er óskað,“ að því er fram kemur í Morgunblaðinu í dag.