Stór og spennandi markaður opnast

„Þetta er áhugavert tækifæri. Þarna er stór og spennandi markaður að opnast. Við munum skoða möguleikana,“ segir Jens Garðar Helgason, framkvæmdastjóri Laxa fiskeldis á Eskifirði.

Hann er spurður að því hvort fyrirtækið hyggist reyna fyrir sér með útflutning á laxi til Kína nú þegar þar hefur opnast tollfrjáls markaður fyrir lax frá Íslandi.

Laxar fiskeldi eru nú að slátra laxi úr sjókvíum í Reyðarfirði. Segir Jens Garðar að fyrirtækið hafi lax í hæsta gæðaflokki og alla burði til að fara inn á þennan markað. Kínamarkaður sé stór og gefi gott verð. „Hann verður vonandi þriðja stoðin undir starfseminni,“ segir Jens Garðar, til viðbótar mörkuðum fyrirtækisins í Evrópu og Ameríku.

Arctic Fish á Vestfjörðum hóf útflutning til Kína í byrjun síðustu viku, strax og síðustu hindrunum fyrir gildistöku fríverslunarsamnings þjóðanna varðandi laxaafurðir hafði verið rutt úr vegi. Útflutningur fyrirtækisins þangað hefur gengið vel og fer vaxandi.