Skortir þorsk á fiskmörkuðum

Vertíð haustsins fer ekkert allt of vel af stað þar sem vöntun var á fiski á fiskmörkuðum í síðasta mánuði. Á móti kemur að verð hefur verið hátt. „Það er hátt verð, en ég hefði viljað sjá meira magn, sérstaklega í þorski. Það virðist vera erfiðara að ná í hann. Í september hefur farið minna í gegnum fiskmarkaðina á landsvísu en í sama mánuði í fyrra,“ segir Benedikt Snær Magnússon, framkvæmdastjóri Fiskmarkaðar Norðurlands. Hann segir haustvertíðina hafa verið góða hjá dagróðrabátum „en ekkert eitthvað einstakt á þessum togurum“.

Í september 2018 fóru í gegnum fiskmarkaðina 8.357 tonn, sem er 752 tonnum meira en í sama mánuði á þessu ári, samdrátturinn nemur því um 9% milli ára. Hvað þorskinn varðar er um 17% minni þorskur sem fer í gegnum markaðina í september þessa árs miðað við sama mánuð 2018.

„Maður finnur það alveg að það er erfiðara að sækja fiskinn, hann er ekki endilega á þessum stöðum sem hann hefur verið. Þá hugsar maður alltaf til þess að það varð loðnubrestur, eitthvað hlýtur það að spila inn í,“ segir Benedikt og bætir við að verð hafi að meðaltali verið 71 krónu hærra. „Það er vöntun á fiski, það hlýtur að vera ástæðan fyrir háu verði.“