Vonar að útgerð aukist í Grímsey

„Ég held að það verði alltaf einhver byggð hér. Grímsey er vinsæll ferðamannastaður á sumrin og ferðamannatíminn er alltaf að lengjast í báða enda. Uppistaða heilsársbyggðar er þó útgerðin. Við skulum bara vona, eins lítið vit og ég hef á útgerð, að það gerist eitthvað sem leiði til þess að hér verði meiri útgerð.“

Þetta segir Karen Nótt Halldórsdóttir, ritari hverfisráðs Grímseyjar hjá Akureyrarbæ, þegar hún er spurð hvort byggð í Grímsey sé í hættu vegna flutnings á kvóta í burtu.

Um helmingur kvóta eyjarinnar fer til Fjallabyggðar með kaupum Ramma á útgerðinni Sigurbirni ehf., að því er fram kemur í umfjöllun um þetta mál í Morgunblaðinu í dag.