Ísfiskur fær fyrirgreiðslu

Stjórn Byggðastofnunar hefur tekið jákvætt í lánsumsókn fiskvinnslunnar Ísfisks á Akranesi en umsóknin var tekin fyrir á fundi hjá stofnuninni í dag. Tekin var ákvörðun um að segja upp 42 starfsmönnum fyrirtækisins fyrir síðustu mánaðamót vegna óvissu um fjármögnun.

Frétt af mbl.is

Enn óvíst með framtíð Ísfisks

Haft er eftir Albert Svavarssyni, framkvæmdastjóra Ísfisks, að lánafyrirgreiðslan sé háð því að ákveðin skilyrði verði uppfyllt sem fyrirtækið þurfi svigrúm til að mæta að því er fram kemur á fréttavef blaðsins Skessuhorns. Fyrir vikið muni áfram ríkja óvissa um framtíð fyrirtækisins í eina til tvær vikur í viðbót.

Engu að síður segist Albert vongóður um að Ísfiskur nái að vinna sig út úr þeim fjárhagslegu þrengingum sem fyrirtækið hafi átt við að stríða eftir flutning starfseminnar úr Kópavogi og á Akranesi. „Ég er vongóður og vona innilega að starfsfólk okkar geti fengið jákvæð tíðindi fyrir mánaðamótin.“

Sævar Freyr Þráinsson, bæjarstjóri Akraness, segir þær fréttir ánægjulegar að fengist hafi vilyrði fyrir lánafyrirgreiðslu frá Byggðastofnun í samtali við mbl.is og það sé von í málinu. Aðspurður segist hann þekkja til skilyrðanna og telja að hægt eigi að vera að uppfylla þau á þeim tíma sem gefinn hafi verið til þess.

• Blogga um frétt