Samið um kolmunna og síld

Fundi strandveiðiríkja um veiðar á norsk-íslenskri síld og kolmunna á næsta ári sem hófust í fyrradag lauk í London í gær. Samið var um heildarkvóta en ekki skiptingu milli landa.

Viðræðum um makrílveiðar lauk í síðustu viku og því er lokið fundum strandríkjanna um uppsjávarveiðar á næsta ári.

Samþykkt var að fara að ráðgjöf Alþjóðahafrannsóknaráðsins (ICES) um heildarveiði á norsk-íslenskri síld upp á 525.594 tonn og heildarveiði á kolmunna upp á 1.161.615 tonn á árinu 2020. Eins og fram hefur komið voru litlar breytingar í ráðgjöf ICES varðandi kolmunna milli þessa árs og næsta en ráðgjöfin um heildarveiðar á norsk-íslenskri síld dróst saman um 11%.

Í umfjöllun um mál þetta í Morgunblaðinu í dag segir Kristján Freyr Helgason, aðalsamningamaður Íslands, að ekki hefði verið samið um skiptingu afla úr þessum stofnum á milli strandveiðiríkjanna.