Að óbreyttu er ekki útlit fyrir loðnuvertíð í vetur og yrði það þá annað árið í röð sem engar loðnuveiðar yrðu stundaðar við landið. Mælingar á loðnu nú í haust voru langt undir viðmiðunarmörkum, en hins vegar mældist talsvert af ungloðnu, sem gæti gefið von um loðnuvertíð í ársbyrjun 2021.

Gunnþór Ingvason, framkvæmdastjóri Síldarvinnslunnar í Neskaupstað, metur að 150 þúsund tonna loðnuafli, sem er ekki stór vertíð í sögulegu samhengi, gæti gefið um 20 milljarða króna í útflutningsverðmæti inn á mikilvægustu markaði fyrir loðnu og loðnuhrogn.

Þorsteinn Sigurðsson, sviðsstjóri uppsjávarsviðs Hafrannsóknastofnunar, segir í umfjöllun um mál þetta í Morgunblaðinu í dag, að niðurstöður loðnumælinga í haust hafi verið þær lélegustu frá því að byrjað var að mæla loðnu á þessum árstíma árið 2010. Hann segir ljóst að framleiðslugeta loðnustofnsins hafi verið skert í nokkuð langan tíma. Það sjáist vel með því að bera saman veiðar á 20 ára tímabili fyrir aldamót þegar meðalafli var rúmlega 900 þúsund tonn á ári, en síðustu 15 ár hafi meðalaflinn verið rétt rúmlega 300 þúsund tonn.

Tengdar fréttir

Loðnuveiðar

Loðnubrestur veldur ugg á Hornafirði

• Loðnubrestur algengur í Barentshafi
• Tímabært að rannsaka afrán hvala
• Loðnubrestur dregur verulega úr hagvexti
• „Enginn talar um hið augljósa“

» Fleiri tengdar fréttir