Þremur bjargað úr sökkvandi báti á Breiðafirði

Þremur mönnum var bjargað úr togbátinum Blíðu, sem var við það að sökkva á Breiðafirði um hádegisbilið í dag. Þyrla Landhelgisgæslunnar var þegar í stað kölluð út sem og sjóbjörgunarsveitir á vegum Slysavarnafélagsins Landsbjargar.

Neyðarkall frá bátnum barst stjórnstöð Landhelgisgæslunnar á tólfta tímanum.

Þá voru skip og bátar í grenndinni beðin um að halda á vettvang að því er fram kemur í tilkynningu frá Landhelgisgæslunni. Klukkan 12:08 var búið að bjarga mönnunum, sem komnir voru í björgunarbát, um borð í fiskiskipið Leyni, sem var í grennd og sem kom á staðinn. Bátur mannanna er sokkinn og var þá þyrlan afturkölluð.

Báturinn datt úr tilkynningarskyldu hjá stjórnstöð Landhelgisgæslunnar, skömmu síðar barst neyðarskeyti frá honum og neyðarblys sást á lofti. Búið var að bjarga mönnunum um borð í fiskiskipið rúmum hálftíma eftir að neyðarkallið barst.

• Blogga um frétt