Flestir starfsmanna komnir á atvinnuleysisskrá

Uppsagnir starfsmanna fiskvinnslunnar Ísfisks á Akranesi tóku gildi um síðustu mánaðamót og eru flestir þeirra rúmlega fjörutíu starfsmanna sem störfuðu hjá fyrirtækinu komnir á atvinnuleysisskrá. Starfsfólk fékk laun sín fyrir septembermánuð einungis greidd að hluta, en öllu var því sagt upp 30. september síðastliðinn.

Albert Svavarsson framkvæmdastjóri fyrirtækisins segir að enn sé unnið að því að uppfylla ákveðna skilmála sem settir voru af Byggðastofnun sem skilyrði fyrir fyrirgreiðslu frá stofnuninni. Stjórn Byggðastofnunar tók jákvætt í lánsumsókn fyrirtækisins um miðjan október.

Frétt af mbl.is

Ísfiskur fær fyrirgreiðslu

Vonast eftir lendingu á næstu tveimur vikum

Albert Svavarsson framkvæmdastjóri Ísfisks. mbl.is/Haraldur Guðjónsson

Skilmálarnir, segir Albert í samtali við mbl.is, lúta meðal annars að hlutafé fyrirtækisins og samningum við lánadrottna. Hann vill ekki tjá sig nánar um það að svo stöddu og vonast til þess að úr leysist á næsta hálfa mánuðinum.

„Þau eru bara komin á atvinnuleysisbætur, flest öll,“ segir hann um starfsfólkið. „Það eru reyndar einhverjir sem eru komnir með aðra vinnu, en flestir eru komnir á atvinnuleysisbætur. Þetta er bara einhver biðstaða sem maður veit ekki hvað tekur langan tíma, en vonandi skýrist það innan tveggja vikna.“

• Blogga um frétt