Togurum gengur erfiðlega að ná í þorsk

„Það hefur verið þyngri veiði en oft áður,“ segir Gunnþór Ingvason, framkvæmdastjóri Síldarvinnslunnar, en erfiðlega hefur gengið fyrir togara að ná í þorsk undanfarnar vikur í samanburði við sama tíma í fyrra. Gunnþór kveðst þó ekki hafa miklar áhyggjur af stöðunni. „Nei við skulum vona að þetta sé nú innan hefðbundinna sveiflna.“

„Eigum við ekki frekar að segja að síðustu sex til sjö árin hafi þetta verið of auðvelt. Við höfum oft séð þetta áður, en það er eitthvað að gerast þannig að það er minni veiði en það hefur verið undanfarið,“ svarar Birkir Hrannar Hjálmarsson, útgerðarstjóri togara hjá Brimi, er hann er inntur álits á stöðunni. Hann segir stöðuna alls ekki alvarlega enda hafi veiðar verið á sambærilegum nótum á árum áður.

Góð veiði á línu

„Við erum með aðeins meiri veiði en í fyrra á þessum tveim mánuðum – september og október – en árið í fyrra var það lélegasta sem við höfum séð í áratug á línu á meðan togararnir voru að mokfiska,“ segir Pétur Hafsteinn Pálsson, framkvæmdastjóri Vísis í Grindavík. Hann segir hins vegar ekki svo að þorskveiðin sé mikið betri þar sem ekki hefur tekist að ná jafn miklu magni og náðist á þessu tímabili 2017 og 2016.

Pétur Hafsteinn bendir á að milli áranna 2017 og 2018 hafi orðið 25-30% samdráttur í veiði á þessum árstíma. „Við erum ekki komnir upp í í september og október það sem við hefðum talið eðlilegt. Þetta er vel undir meðaltali.“