Strandaður bátur í Þistilfirði

Björgunarsveitir frá Raufarhöfn og Þórshöfn hafa verið kallaðar út vegna báts sem er strandaður í Þistilfirði. Að sögn lögreglunnar á Norðurlandi eystra amar ekkert að áhöfn bátsins og hún ekki talin í neinni hættu. 

Samkvæmt upplýsingum frá Landhelgisgæslunni hafði áhöfn línubátsins Lágey ÞH-265 samband við stjórnstöð Landhelgisgæslunnar klukkan 4:30 í nótt á fjarskiptarásinni VHF-16 og tilkynnti að bátinn hefði rekið í strand í vestanverðum Þistilfirði, um miðja vegu á milli Þórshafnar og Raufarhafnar.

Lágey er 15 tonna og 13 metra langur yfirbyggður trefjaplastbátur. Fjórir eru í áhöfn og fer vel um þá miðað við aðstæður. Veður er tiltölulega gott á strandstað, lögn og gott skyggni en svolítil hafalda.

Að sögn skipstjóra kæmust þeir í land á fjöru en vegna myrkurs sjá þeir ekki neitt frá sér. Varðstjórar í stjórnstöð Landhelgisgæslunnar kölluðu þegar út áhöfn þyrlunnar TF-EIR og er áætlað að hún verði á strandstað um kl. 06:55.

Björgunarsveitir Slysavarnafélagsins á Þórshöfn og Raufarhöfn voru ræstar út og hafa björgunarskipið Gunnbjörg og línubáturinn Háey frá Raufarhöfn og harðbotna slöngubáturinn Jón Kr. frá Þórshöfn auk fiskibátsins Dags frá Þórshöfn haldið áleiðis að strandstað. Áætlað er að björgunarskipið Gunnbjörg verði við strandstað um sexleytið.

Björgunarsveitir hafa einnig farið landleiðina og freista þess með leiðsögn bónda af svæðinu að komast á strandstað en samkvæmt kortaupplýsingum eru brattar hlíðar upp af fjörunni þar sem Lágey ÞH-225  er strönduð.

Frétt af mbl.is

Vélarrúmið fór að fyllast af vatni

Frétt af mbl.is

Lágey sigldi á sker

Frétt af mbl.is

Skipstjórar sofna við stýrið

Frétt af mbl.is

Lágey dregin til hafnar

Lágey ÞH-265. Morgunblaðið/Hafþór

• Blogga um frétt