Beitir með 3.100 tonn af kolmunna

þokkalega hefur gengið á kolmunnaveiðum austur af Færeyjum undanfarið, en í gær voru nokkur íslensk skip þar að veiðum. Beitir NK kom til Neskaupstaðar í gærmorgun með 3.100 tonn, en mestum afla úr einni veiðiferð Beitis var landað 20. apríl sl., en þá komu 3.212 tonn upp úr skipinu.

Ekkert annað íslenskt fiskiskip hefur komið með svo mikinn afla að landi úr veiðiferð, segir á heimasíðu Síldarvinnslunnar.

Þar er haft eftir Sturlu Þórðarsyni skipstjóra að enginn svakalegur kraftur hafi verið í veiðunum undanfarið. „Við vorum átta daga að veiðum og fengum aflann í átta eða níu holum. Mest fengum við 480-490 tonn í holi en yfirleitt var lengi dregið. Við drógum upp í 22 tíma. Venjulega var kastað seinni part dags og híft morguninn eftir. Stærsti plúsinn við túrinn var veðrið, en það var blíða hvern einasta dag. Fiskurinn er að ganga í austur og undir lokin vorum við komnir alveg að ensku línunni,“ segir Sturla.

Alls eru íslensk skip búin að veiða 234 þúsund tonn af kolmunna í ár og eiga 33 þúsund eftir, samkvæmt vef Fiskistofu. aij@mbl.is