GPG sagt kaupa Halldór á Bakkafirði

Samningar um kaup sjávarútvegsfyrirtækisins GPG Seafood ehf. á Húsavík á Halldóri Fiskvinnslu ehf. á Bakkafirði hafa náðst, að því er fram kom í hádegisfréttum RÚV. Í eigu fiskvinnslunnar er fiskverkun, línubáturinn Halldór NS-302 og veiðiheimildir sem nema 152,1 tonnum samkvæmt síðustu úthlutun, þar af 141 tonn í þorski.

Áki Guðmundsson, eigandi Halldórs fiskvinnslu, vildi ekki tjá sig við blaðamann er leitað var til hans. Þá vildi heldur ekki Páll Kristjánsson, framkvæmdastjóri GPG, tjá sig er leitað var staðfestingar á málinu og benti hann á stjórnarformann félagsins. Ekki náðist samband við Gunnlaug Karl Hreinsson, stjórnarformann GPG.

GPG er með starfsemi á þremur stöðum á landinu. Hrognavinnslu og frystingu uppsjávarfisks á Raufarhöfn, útgerð, saltfiskvinnslu og fiskþurrkun á Húsavík auk útgerðar og saltfiskvinnslu á Stykkishólmi. Halldór Fiskvinnsla er stærsta fyrirtækið á Bakkafirði.

Halldór NS-302, sem áður hét Óli í Stað GK, er sagður fylgja kaupunum. Ljósmynd/Hafþór Hreiðarsson

• Blogga um frétt