Atvinnutekjur í sjávarútvegi í takt við umsvif

Heildaratvinnutekjur í sjávarútvegi á Íslandi jukust um tæp 6% að raunvirði árið 2018 borið saman við 2017. Þar af jukust atvinnutekjur í fiskveiðum um tæp 8% en í fiskvinnslu um 3%, að því er fram kemur í greiningu Samtaka fyrirtækja í sjávarútvegi (SFS). Heildaratvinnutekjur á Íslandi námu 1.316 milljörðum króna á árinu 2018. „Það er aukning upp á rúm 5% að raunvirði frá árinu 2017 sem rímar vel við umsvifin í hagkerfinu á sama tíma.“

Í greiningunni segir að minni aukning í fiskvinnslu kunni að skýrast af fækkun starfsmanna í greininni, en þeim fækkaði um 3% milli áranna 2017 og 2018. Á sama tíma fjölgaði starfsmönnum í veiðum um 2%.

Ef tekin eru út áhrif breytinga í starfsmannafjölda kemur í ljós að atvinnutekjur hækkuðu meira í vinnslu en í veiðum, eða um tæp 7% á móti tæpum 6%. „Aukninguna í atvinnutekjum í sjávarútvegi má meðal annars rekja til sjómannaverkfallsins í ársbyrjun 2017, sem setti sitt mark á rekstur fyrirtækjanna og þar með atvinnutekjur í greininni,“ segir í greiningu SFS.

Þá jukust atvinnutekjur af fiskeldi um rúm 7% að raunvirði milli ára sem var lítillega umfram fjölgun starfsmanna í greininni á sama tíma.

• Blogga um frétt