Þorskkvóti minnkaður til muna í Norðursjó

Noregur og Evrópusambandið hafa komist að samkomulagi um að úthlutaður þorskveiðikvóti í Norðursjó verður skorinn niður um 40%, en veiðiheimildir verða samt umfram ráðgjöf alþjóðlegu hafrannsóknastofnunarinnar ICES, að því er fram kemur í umfjöllun Undercurrent.

Aðeins verður heimilt að veiða 17.679 tonn af þorski í Norðursjó á þessu fiskveiðiári. Á síðasta fiskveiðiári nam úthlutaður kvóti 29.437 tonnum. Ráðgjöf ICES var hins vegar að aðeins yrðu veidd 10.457 tonn sem væri 64% samdráttur milli fiskveiðiára.

Samhliða samdrætti í þorski munu veiðiheimildir í ufsa dragast saman um 15% og lýsu um 13%, samkvæmt samkomulaginu. Ámóti kemur að veiðiheimildir í ýsu verða auknar um 23% og 17% í skarkola.

Lýsa yfir vonbrigðum

„Árið verður erfitt fyrir norska sjómenn,“ er haft eftir Harald Nesvik, sjávarútvegsráðherra Noregs. Hann bendir þó á að mikilvægt sé að koma þorskstofninum til bjargar enda sé hann í veikri stöðu.

Fergus Ewing, sjávarútvegsráðherra skosku heimastjórnarinnar, segir í samtali við Shetland Times að samkomulagið við norðmennina hafi verið „vonbrigði“ og að þetta hafi í för með sér „mikla áskorun fyrir skosk sjávarútvegsfyrirtæki.“ Þá heita skosk yfirvöld að koma til móts við áfallið sem þarlendar útgerðir kunna að verða fyrir.

• Blogga um frétt