Góður afli togaranna á nýliðnu ári

Almennt mun nýliðið ár hafa verið gott hjá togaraflotanum. Tveir ísfisktogarar, Viðey RE og Björg EA, veiddu rúmlega 10 þúsund tonn á árinu, sem hefur trúlega ekki gerst áður.

Fyrir ekki svo mörgum árum þótti gott ef ísfisktogarar komu með fimm til sex þúsund tonn að landi á einu ári. Bæði voru skipin smíðuð í Tyrklandi og komu til landsins 2017.

Sólberg ÓF, frystiskip Ramma hf., var það skip sem kom með mestan bolfiskafla á land á árinu. Aflinn var 13.732 tonn, sem trúlega er met, og það sama á við um aflaverðmætið, sem nam alls rúmlega fimm milljörðum króna. Sólbergið kom einnig nýtt til landsins 2017 og var smíðað í Tyrklandi.