10,62 krónur fyrir þorskkíló

Auglýsing um veiðigjald á þessu ári hefur verið birt í Stjórnartíðindum. Um talsverða lækkun er að ræða í mörgum fisktegundum, en gjaldið miðast við hvert kíló óslægðs afla sem landað er á tímabilinu 1. janúar til 31. desember 2020.

Veiðigjald fyrir þorsk er nú 10,62 kr., 14,86 fyrir ýsu, 1,69 fyrir makríl og 1,57 kr. fyrir kíló af síld. Landssamband smábátaeigenda hefur reiknað út breytingar í einstökum tegundum og lækkar veiðigjald í þorski um 23%, 8% í ýsu, 50-60% í ufsa, karfa og makríl og yfir 80% í loðnu og kolmunna. Veiðigjald fyrir steinbít hækkar um 16%, samkvæmt yfirliti LS.

Skili um fimm milljörðum

Áætlað er að innheimta veiðigjalds skili fimm milljörðum kr. á þessu ári, en fyrir nýliðið ár er áætlað að greiddir verði um sjö milljarðar í veiðigjald, lækkunin nemur rúmlega tveimur milljörðum eða tæplega 30%.