Landssamband veiðifélaga mótmælir harðlega þeirri fyrirætlan sjávarútvegs- og landbúnaðarráðherra að fella brott ákvæði gildandi fiskeldisreglugerðar um bann við sjókvíaeldi á friðunarsvæði við ósa laxveiðiáa. Þetta kemur fram í ályktun samtakanna.

„Ráðherra hefur haldið því fram að lögfesting áhættumats erfðablöndunar tryggi vernd laxastofna með sama hætti og reglugerðarákvæðið hefur gert allt frá því það var sett árið 1988. Það er fyrirsláttur. Það er augljóst að með þessari breytingu er ráðherra að tryggja að ekkert fái stöðvað áform um laxeldi á gildandi friðunarsvæði Langadalsár og Hvannadalsár í Ísafjarðardjúpi. Þá opnar þessi breyting á eldi í næsta nágrenni við árnar i Eyjafirði, svo sem Fnjóská þar sem þessi fjarlægðarmörk skipta miklu máli.

Hafa verður í huga að áhættumat erfðablöndunar tekur að lögum einvörðungu til mögulegrar erfðamengunar af völdum laxeldis. Aðrir áhættuþættir svo sem sjúkdómahætta og laxalús eru ekki þættir sem meta á í áhættumati erfðablöndunar samkvæmt lögum um fiskeldi. Vert er að benda á að samkomulag um fyrirkomulag áhættumatsins var svikið með því að lögfesta að taka ætti tillit til mótvægisaðgerða fiskeldisfyrirtækjanna en ekki áhrifa af lús og sjúkdómum. Varðandi þessa þætti skiptir fjarlægðarverndin öllu máli.

Landssambandið undrast því ummæli sviðsstjóra fiskeldis hjá Hafrannsóknastofnun um að áhættumatið taki á þessum þáttum. Landssambandið telur nauðsynlegt að núverandi regla um bann við sjókvíaeldi á friðunarsvæðum í námunda við laxveiðiár verði áfram í nýrri reglugerð um fiskeldi.

Það er augljóst að með þessari breytingu er ráðherra að veikja varnir þeirra laxastofna sem  friðunarákvæðin taka nú til í reglugerð og eru yfirlýsingar hans um að ekki sé verið að gefa afslátt af kröfunni um vörn fyrir villta laxastofna á Íslandi því fráleitar,“ segir í yfirlýsingu frá Landssambandi veiðifélaga um fjarlægðarmörk sjókvíaeldis.

Tengdar fréttir

Fiskeldi

Arnarlax brýtur 100 þúsund tonna múrinn

• Slátrað úr kvíum við Haukadalsbót
• Fordæmalaus andstaða ekki í vegi eldis
• Sveiflukennt ár fyrir laxeldið
• Fyrstu seiðin komin í Viðlagafjöru

» Fleiri tengdar fréttir

• Blogga um frétt