Gísli Jón Kristjánsson, eigandi Öldunnar, eina bátsins sem slapp þegar snjóflóð féll á höfnina á Flateyri í gærkvöldi, segir að hann hafi stokkið 25 ár aftur í tímann við fregnir af flóðinu. 

„Þetta er ekki gott fyrir þá sem til þekkja. Sem betur fer sluppu allir og sýnir það að varnargarðarnir eru að hjálpa gríðarlega mikið,“ segir Gísli í samtali við mbl.is. Hann hefur verið veðurtepptur á Ísafirði síðustu tvo daga og óvíst er hvenær hann getur kynnt sér aðstæður í höfninni á Flateyri. 

Fregnir af flóðunum fékk Gísli á samfélagsmiðum og á fyrstu myndunum sem hann sá glitti í Ölduna og hann grunaði því að báturinn hefði sloppið, sem reyndist rétt. „Ég sá bara það að þarna var gríðarlegt magn af snjó, höfnin full. Það er mikið af snjó sem hefur farið þarna yfir og merkilegt hvernig bátarnir hafa farið, einn er á hvolfi, sem er dálítið sérstakt.“

Hugsaði fyrst og fremst til íbúanna

Gísli segir að honum hafi fyrst og fremst verið hugsað til íbúanna. „Maður finnur gríðarlega mikið til með fólkinu. Það er alveg merkilegt hvað á að reyna á þetta blessaða fólk, árásirnar koma úr öllum áttum.“ 

Hann viðurkennir að honum hafi vissulega létt þegar hann vissi að Aldan hefði sloppið. „En ég var aðallega að hugsa um fólkið. Bátar og dauðir hlutir, það má alltaf bæta, jú jú maður hugsar til þess, en maður hefur ekki áhyggjur fyrr en maður veit að allir eru sloppnir. Ef ég segi alveg eins og er hafði ég ekki miklar áhyggjur af bátnum. En svo er hörkulið á staðnum, björgunarsveitin hugsar vel um allt og þeir eiga miklar þakkir skilið.“ 

Aldan, dragnóta- og netabátur, var í höfninni á Flateyri í gær þegar snjóflóðið féll. Sjö bátar voru við höfnina og var Aldan sá eini sem slapp. Ljósmynd/Gretar Þór Sæþórsson

Guðmundur Kristjánsson, hafnarstjóri Ísafjarðarbæjar, sagði ástandið skelfilegt þegar blaðamaður náði tali af honum í morgun. Af sjö bát­um við höfn­ina var Aldan eini báturinn við hafn­arkant­inn og slapp hann alveg. Undirbúningur á hreinsunarstarfi í höfninni er hafinn. Ljóst er að tjónið er gríðarlegt. 

Frétt af mbl.is

„Þetta er skelfilegt“

„Það er spurning hvernig bátarnir hafa farið, en þetta var mikil holskefla sem kom á það og áfallið er mikið. Maður trúir þessu ekki, þetta er alveg ótrúlegt. Við lærum öll af þessu og nú bætum við í og lögum hlutina sem aflaga hafa farið og gerum það fljótt. Lífið heldur áfram og sem betur fer sluppu allir ómeiddir,“ segir Gísli. 

Tengdar fréttir

Snjóflóð á Flateyri og Súgandafirði

„Flateyringar eru alveg sultuslakir“

• Enn unnið að hönnun þó þrjú ár séu frá snjóflóði
• Reynt að auka virkni varnargarða
• „Mér finnst ég enn þá örugg hérna“
• 265 þúsund tonna snjóflóð

» Fleiri tengdar fréttir

• Blogga um frétt