Samstarf áfram en ekki sameining

Tekin hefur verið ákvörðun um að samstarf haldi áfram á milli sjávarútvegsfyrirtækjanna Vísis hf. og Þorbjarnar hf. í Grindavík, en beinum viðræðum um sameiningu þeirra hefur verið formlega hætt. Þetta kemur fram í fréttatilkynningu til fjölmiðla.

„Viðræður um mögulega sameiningu hófust sl. haust og voru fjölmargir vinnuhópaðir skipaðir til að skoða alla snertifleti og hafa þeir nú skilað inn tillögum sínum. Eftir yfirferð þeirra er niðurstaðan sú að fara ekki með sameiningarmál lengra að sinni, en halda þess í stað góðu samstarfi Þorbjarnar hf. og Vísis hf. áfram og nýta niðurstöðu vinnuhópanna til að styrkja það samstarf enn frekar. Þrátt fyrir þessa niðurstöðu nú, telja eigendur fyrirtækjanna tveggja að hún útiloki ekki aðra möguleika í framtíðinni.“

Þá segir að Vísir og Þorbjörn séu rótgróin og öflug sjávarútvegsfyrirtæki, svipuð að stærð og hafi í gegnum árin unnið talsvert saman. Þau eigi meðal annars félög saman á borð við Haustak, Codland og sölufyrirtæki á Grikklandi. Vel yfir 600 manns starfi hjá fyrirtækjunum tveimur sem samanlagt hafi um 44 þúsund tonn af aflaheimildum. Ljóst sé að gott samstarf mun gagnast fyrirtækjunum vel og auka sóknartækifæri þeirra á erlendri grundu.

• Blogga um frétt