Vinna þorsk fyrir 320 krónur í dagslaun

Þorskur úr atlantshafi er fluttur um 16 þúsund kílómetra áður en hann ratar í verslanir í Bretlandi þar sem fiskvinnla í Kína þykir einstaklega hagstæð, að því er fram kemur í umfjöllun breska blaðsins The Sun.

Eftir að fiskurinn er veiddur er hann frystur og siglt með hann um 8 þúsund kílómetra til Kína. Þar vinnur fiskvinnslufólk, með um 320 krónur í dagslaun, fiskinn og endurfrystir hann áður en þorskurinn er settur um borð í flutningaskip sem koma honum aftur til Bretlands.

Þessi aðferð er notuð fyrir fisk í stórum verslunarkeðjum í Bretlandi, þar á meðal Tesco, Asda og Iceland. Fulltrúar verslananna segja kínverska fiskvinnslufólkið vera sérfræðinga í fagi sínu og að breskar vinnslur séu ekki með hæfileika eða aðstöðu til þess að keppa við kínverskar vinnslustöðvar. Um þriðjungur af unnum fiski fer í gegnum fiskvinnslur í Kína.

Þorskur úr Atlantshafi er fluttur um 16 þúsund kílómetra áður en hann ratar í hillur verslanna í Bretlandi. mbl.is/Helgi Bjarnason

Haft er eftir Bob Ward, hjá London School of Economics, að þessar siglingar hafi gríðarlega neikvæð áhrif á umhverfið og að eina ástæða þess að fiskurinn sé unninn í Kína sé fjárhagshvatinn sem fylgir lágum launum verkafólks þar í landi.

Talsmaður verslananna Iceland segir evrópskar vinnslustöðvar einfaldlega ekki geta keppt hvað verð og gæði varðar. Tesco segir markmið keðjunnar að bjóða heilbrigð og sjálfbær matvæli á viðráðanlegu verði. „Hluti fisksins okkar er veiddur á svæðum sem hafa ekki réttan aðbúnað eða þekkingu til þess að flaka og pakka fisk með afkastamiklum hætti og er hann því sendur annað.“

• Blogga um frétt