Nýr Páll Jónsson GK kom í dag

Fjölmenni var á kajanum í Grindavík í dag þegar nýtt skip Vísis, Páll Jónsson GK 7, kom til hafnar eftir siglingu frá Póllandi. Heimferðin tók hálfan sjöunda sólarhring og var bræla stóran hluta þess tíma.

Skipið nýja er 45 metra langt, 10,5 á breidd og er fyrsta nýsmíðin af þessari stærðargráðu í sögu Vísis ehf. sem gaf um það bil milljarð króna fyrir gripinn. Skipstjóri er Gísli Jónsson sem sagði í samtali við 200 mílur að vinnslubúnaður væri að mestu kominn í skipið. Aðeins fínstillingar væru eftir. Hægt væri því að halda til veiða mjög fljótlega.   

Frekari endurnýjun er fram undan á skipastól Vísis, en þegar hefur Fjölnir verið endurbættur mikið og endursmíaður Sighvatur er nánast nýr frá kili. Gamla Páli Jónssyni verður lagt, en þar hefur Gísli Jónsson, sem nú er tekinn við sem skipstjóri á nýju skipi, staðið í brúnni í árafjöld. 

Tekið var á móti skipinu nýja með kostum og kynjum. Hér heldur Gísli Jónsson skipstjóri á hjartastuðtæki sem var gjöf frá VÍS. Pétur Hafsteinn Pálsson framkvæmdastjóri Vísis stendur vinstra megin við Gísla. Ljósmynd/Jón Steinar Sæmundsson

• Blogga um frétt