Humarveiðarnar áfram í lágmarki

Humarveiðar ársins verða í lágmarki eins og var í fyrra. Hafrannsóknastofnun ráðleggur að humaraflinn í ár verði ekki meiri en 214 tonn svo fylgjast megi með stærðarsamsetningu og dreifingu stofnsins.

Í fyrra var heimilt að veiða 235 tonn, en fyrir um áratug var ársaflinn yfir tvö þúsund tonn á ári. Fyrirliggjandi gögn benda til að nýliðun sé í sögulegu lágmarki og að árgangar frá 2005 séu mjög litlir. Verði ekki breyting þar á má búast við áframhaldandi minnkun stofnsins. Jónas P. Jónasson, fiskifræðingur, segir að mat á fjölda humarlirfa hafi verið heldur hærra 2019 en 2018. Af þeim megi þó ekki draga of miklar ályktanir þar sem mælingar á lirfum séu aðeins til fyrir þessi tvö ár.

Meðalþyngd humars var mjög há í fyrra og skýrist að mestu af lítilli nýliðun og þar af leiðandi er hlutdeild eldri humars há, að því er fram kemur í Morgunblaðinu í dag.