Björgólfur Jóhannsson, starfandi forstjóri Samherja, sagði í viðtali við fiskveiðifréttavefinn IntraFish í vikunni að Samherji hefði ekki tapað neinum viðskiptavinum frá því Samherjaskjölin voru birt um miðjan nóvember.

„Við höfum ekki tapað neinum viðskiptavinum hingað til en þeir hafa áhyggjur af þessu og við erum búin að vera að vinna náið með þeim,“ er haft eftir Björgólfi í viðtalinu, sem birtist á þriðjudaginn.

Þar segir Björgólfur einnig að hann eigi von á því að innanhússrannsókn norsku lögfræðistofunnar Wikborg Rein gæti lokið í apríl og að hann eigi ekki von á því að vera í forstjórastóli sjávarútvegsfyrirtækisins nema fram á mitt þetta ár.

Hann útilokar ekki að Þorsteinn Már Baldvinsson hefji aftur störf þegar Wikborg Rein skilar skýrslu sinni til Samherja, en segir það velta á því hver niðurstaða innanhússrannsóknarinnar verði.

„[Þorsteinn] hefur verið í sjávarútvegi á Íslandi í fjölda ára og er örugglega sá maður sem mest veit um fiskvinnslu bæði á Íslandi og í Evrópu,“ hefur IntraFish eftir forstjóranum.

Björgólfur hafnar því alfarið í viðtalinu að störf Wikborg Rein fyrir Samherja séu til málamynda og miðist að því að sýkna fyrirtækið af þeim ásökunum sem settar hafa verið fram og eru rannsakaðar af yfirvöldum hérlendis og í Namibíu.

„Fyrirtækið sjálft vill vita hvað var að gerast,“ segir Björgólfur við IntraFish.

Tengdar fréttir

Samherji í Namibíu

Vilja skoða tölvu Jóhannesar

• Þúsundir smáskilaboða fundust í tölvu
• Vandar Jóhannesi ekki kveðjurnar
• Óvíst hvort niðurstaðan verður kærð
• Yfirframleiðandinn kominn með stöðu sakbornings

» Fleiri tengdar fréttir

• Blogga um frétt