Birta myndir af óhreinum fiskikörum

Eftirlitsmenn Matvælastofnunar hafa víða orðið varir við óhreinindi í fiskikörum sem eru í notkun undir matvæli. Einnig berast stofnuninni reglulega kvartanir frá sjómönnum og fiskkaupendum um óhrein og skemmd löndunarkör, segir í tilkynningu á vef stofnunarinnar.

Bendir Matvælastofnun á að kör sem notuð eru fyrir matvæli þurfa að vera hrein og að slíkt sé aðeins tryggt með hreinsun eftir hverja notkun. Jafnframt segir stofnunin „óæskilegt að nota fiskikör fyrir annað en matvæli. Kör til annarra nota skal merkja sem slík og ekki nota aftur fyrir matvæli.“

Birt eru með tilkynningunni myndir af körum sem eftirlitsmenn hennar hafa tekið á höfnum landsins og er sérstaklega tekið er fram að um er að ræða kör sem notuð eru undir fisk, en ekki kör sem hafa verið tekin úr notkun. „Matvælastofnun mun fylgjast áfram með ástandi kara og hvetur þá sem leggja kör fram til löndunar að minnast þess að körin eru ílát undir matvæli.“

Myndir eftirlitsmanna MAST á höfnum ÍSlands - fiskikör Mynd/Matvælastofnun

• Blogga um frétt