Veiðigjaldið áþekkt því sem orðið hefði

Tekjur ríkissjóðs af veiðigjaldi verða áþekkar þeim sem hefðu fallið til ef eldri lög um veiðigjald hefðu verið framlengd óbreytt. Það er í samræmi við markmið laganna.

Kemur þetta fram í skriflegu svari sjávarútvegsráðherra við fyrirspurn frá Þorsteini Víglundssyni, þingmanni Viðreisnar, um fjárhæð veiðigjalda út frá mismunandi lögum.

Tekið er fram í svari ráðuneytisins að ekki sé hægt að áætla fjárhæð veiðigjalda fyrri fiskveiðiára samkvæmt núgildandi lögum þar sem ekki liggi fyrir allar forsendur, sérstaklega upplýsingar um skattalegar fyrningar veiðiskipa sem er nýr frádráttarliður í reiknistofni.

Veiðigjald ársins 2017 var 6,2 milljarðar en það hefði orðið 9,3 milljarðar ef reikniformúla nýju laganna hefði verið notuð. Þetta snýst við árið 2018. Þá var álagt veiðigjald 11 milljarðar en hefði orðið 8,7 milljarðar samkvæmt nýju lögunum, að því er fram kemur í Morgunblaðinu í dag.