Áfram unnið að því að hætta starfsemi í Namibíu
Setja bókamerki
Samherji mun alfarið hætta starfsemi í Namibíu á næstunni, en unnið er að því þessi misserin. Af þeim þremur skipum sem félagið á og hafa verið starfrækt við strönd Namibíu eru tvö þegar farin í burtu og unnið er að því að finna lausnir með þriðja skipið í samráði við namibísk stjórnvöld. Þetta kemur fram í tilkynningu á vefsíðu fyrirtækisins í dag.
Greint var frá því að togararnir tveir, Geysir og Saga, væru farnir frá Namibíu í þessari og síðustu viku. Saga fór í slipp til Las Palmas en Geysir var sendur á veiðar í Máritaníu. Greint var frá því í namibískum miðlum að á þriðja hundrað sjómenn á togurunum séu nú í óvissu vegna málsins.
Haft er eftir Björgólfi Jóhannssyni, starfandi forstjóra Samherja, í tilkynningunni að félagið hafi fundað með þeim sjómönnum sem eiga í hlut og fulltrúum stéttarfélaga þeirra og muni Samherji leitast við að veita eins mörgum þeirra áframhaldandi vinnu og mögulegt er. Líklegast er að það muni tengjast Heinaste, þriðja togara fyrirtækisins, en hann er enn við Namibíu. „Áður en Samherjasamstæðan mun alfarið hætta starfsemi í Namibíu munu dótturfyrirtæki samstæðunnar í landinu uppfylla allar skyldur gagnvart skipverjum sem hafa unnið fyrir þessi fyrirtæki,“ segir þar.
Segir í tilkynningunni að unnið sé með stjórnvöldum að því að finna viðeigandi lausn í því máli, að minnsta kosti tímabundið með leigu verksmiðjutogarans til namibískra aðila sem stunda útgerð í landinu.
Í gær var Arngrímur Brynjólfsson, skipstjóri Heinaste, dæmdur til að greiða átta milljónir króna í sekt eftir að hafa verið fundinn sekur um ólöglegar veiðar í nóvember. „Það er mjög ánægjulegt að mál vegna skipsins Heinaste og skipstjóra þess var leitt til lykta fyrir dómi í Namibíu á miðvikudag. Þetta skapar ný tækifæri í rekstri skipsins og við viljum að þau verði nýtt í Namibíu,“ er haft eftir Björgólfi í tilkynningunni.
Óskar atbeina Alþingis vegna byrlunar
Ein flugbraut eftir á Reykjavíkurflugvelli
„Sá það bara hverfa í einni vindhviðu“
Viðtalið sem sprengdi meirihlutann?
/frimg/1/46/36/1463611.jpg)
„Það er búið að þvarga hérna fram og til baka“