Bréf um líðan starfsmanna kom á óvart
Setja bókamerki
„Ég er ekki sáttur við að vera brigslaður við að bera ekki virðingu fyrir mínu fólki. Það er það síðasta sem ég vil heyra,“ segir Sigurður Guðjónsson, forstjóri Hafrannsóknastofnunar, í samtali við 200 mílur um bréf sem Félag íslenskra náttúrufræðinga (FÍN) sendi forstjóranum í síðustu viku. Þar segir að félagsmenn FÍN upplifi það að þeim sé hótað og að ágreiningur sé þaggaður niður.
Hann telur bréfið ekki kalla á einhver sérstök viðbrögð af hálfu Hafrannsóknastofnunar. „Við fengum þetta bréf og höfum svo sem ekki brugðist neitt við því ennþá og óvíst að við gerum það.“
Spurður hvort hann telji erfiðan anda innan stofnunarinnar, svarar Sigurður því neitandi. „Ekki viljum við meina það. Hann var ekki góður – eðlilega – þegar við þurftum að grípa til uppsagna og við höfum fullan skilning á því, en fólk er nú að jafna sig á því og þetta kemur dálítið á óvart að fá þetta bréf núna. Ég veit ekki hversu mikið þetta kjarafélag er inn í málum hér, en kannski eru þeir seinir, á eftir í þróuninni,“ útskýrir hann og vísar til þess að uppsagnir hjá stofnuninni áttu sér stað í nóvember í fyrra.
Aðstæður batnandi
Þá er ekki tilefni til þess að hefja skoðun á því hvernig sé haldið á starfsmannamálum vegna bréfsins, að mati forstjórans. „Við erum með mánaðarlega starfsmannafundi, það eru sviðsfundir að lágmarki tvisvar í mánuði og það eru árleg starfsmannaviðtöl. Þannig að við erum með öll spjót úti – hlusta og hlera hvernig fólki líður og reynum að bæta úr þar sem það er hægt.“
Mikil áhersla er lögð á að tryggja gott starfsumhverfi, að sögn Sigurðar sem jafnframt segir aðstæður innanhúss hafi farið batnandi að undanförnu. „Auðvitað var það ákveðið áfall fyrir fólk að upplifa þessar uppsagnir. Það voru ekki nema fjórir náttúrufræðingar sem misstu vinnuna, þetta var aðallega fólk í stoðþjónustu sem missti starfið. En auðvitað eru svoleiðis mál alltaf erfið og maður fer ekki í svoleiðis aðgerðir að gamni sínu.“
Snapchat verst af þeim öllum
„Vindar frelsis fái að leika um samfélagið“
Vottar Jehóva fyrir áfrýjunardómstól
Um 90 milljónir í vanskilum
Telur dóminn ekki hafa áhrif á viðræður
„Ljóst mál að fólk mætir í vinnuna á morgun“