Innan við 1% ferða á sjó undir eftirliti

Starfsmenn Fiskistofu voru 674 eftirlitsdaga á sjó á árinu 2019 og starfa um 30 starfsmenn við veiðieftirlit stofnunarinnar. Þá komu upp 219 brotamál í fyrra og hafa slík tilvik verið 1.443 á árunum 2013 til 2019.

„Eftirlit með fiskveiðiauðlindinni er mjög umfangsmikið en mannaflinn takmarkaður,“ segir Áslaug Eir Hólmgeirsdóttir, starfandi forstjóri Fiskistofu, í ViðskiptaMogganum í dag. Hún bendir á að um er að ræða stórar stærðir þegar litið er til heildarafla, fjölda útgefinna veiðileyfa og fjölda hafnarvoga.

En heildarafli íslenskra fiskiskipa nam 1.048 þúsund tonnum árið 2019. Þá var fjöldi útgefinna veiðileyfa til aflamarksskipa og krókaaflamarksbáta 1.148 og fjöldi sérveiðileyfa 1.103. Jafnframt eru um 60 hafnarvogir í landinu auk þess að um hundrað fiskvinnslur, fiskimarkaðir og aðrir aðilar hafi vigtunarleyfi frá Fiskistofu.

Áslaug Eir Hólmgeirsdóttir.

Áslaug segir stjórnvöld ekki hafa skilgreint hversu umfangsmikið eftirlit stofnunarinnar á að vera. „Það er ekkert lágmarkseftirlit sem skilyrði um að lögbundið eftirlit sé uppfyllt. Það liggur fyrir að eftirlit okkar á sjó er innan við eitt prósent allra veiðiferða. Miðað við þessi verðmæti sem eru undir hlýtur það að teljast lágt hlutfall. Á sama tíma berast ábendingar um brottkast afla og fyrir liggja sterkar vísbendingar hjá stofnuninni um að slíkt viðgangist. Því er eðlilegt að velta upp þeirri spurningu hvort 1% þekja í sjóeftirliti geti talist fullnægjandi í baráttu gegn brottkasti,“ spyr Áslaug.