Um 90 þúsund tonn og ekki tilefni til að gefa út kvóta

Bergmálsgögn af mælum þriggja veiðiskipa, Barkar, Polar Amaroq og Hákonar, sýna samkvæmt bráðabirgðamati að nálægt 90 þúsund tonn af loðnu hafi verið mæld við Papey á sunnudag.

Hafrannsóknastofnun telur, út frá fyrirliggjandi gögnum, líkur á að umrædd loðnuganga sé sú sama og var mæld úti af norðausturhorninu fyrr í mánuðnum. „Þessar niðurstöður gefa ekki tilefni til breyttrar ráðgjafar,“ segir á vef Hafrannsóknastofnunar.

Líkur hafa því aukist á að loðnubrestur verði annað árið í röð, en slíkt mun ekki hafa gerst áður. „Takmörkuð yfirferð veiðiskipa á sunnudag er sú fjórða í röðinni á árinu, engin hinna þriggja fyrri sem allar voru heildstæðari gaf tilefni til ráðgjafar um að opna fyrir veiðar,“ segir í frétt Hafró.

Veiðiskipin kortlögðu fremsta hluta loðnugöngunnar skammt undan Papey og var um stóra hrygningarloðnu að ræða, segir í frétt Hafró. Á Hafrannsóknastofnun er verið er að vinna loðnusýni frá svæðinu.