Öflugt upphaf vertíðar

„Ég man ekki eftir jafn sterkri byrjun á ári. Aflabrögð eru góð og fiskurinn stór og vel á sig kominn. Það fer saman við að allir markaðir eru galopnir og þess vegna hefur gengið vel að vinna aflann og selja,“ segir Pétur H. Pálsson, framkvæmdastjóri útgerðar- og fiskvinnslufyrirtækisins Vísis hf. í Grindavík.

Nokkrar frátafir hafa verið frá veiðum vegna veðurs, sérstaklega fyrstu tvær vikur ársins. „Aflinn hefur verið mjög góður í febrúar og þá daga sem við náðum að róa í janúar. Við náðum 14 róðrum í febrúar sem er ágætt miðað við árstíma en margir róðrar hafa verið ansi erfiðir,“ segir Kristinn Arnberg Kristinsson, skipstjóri á Daðey GK-777, línubáti Vísis.

Hann var að landa í Grindavík í fyrradag þegar tíðindamaður Morgunblaðsins kom við á bryggjunni. Afli dagsins var 21 tonn og þurfti áhöfnin að fara tvær ferðir til að koma aflanum í land. Kristinn segir að þeir hafi landað 157 tonnum í febrúar sem gera rúm 11 tonn að meðaltali í róðri og er hann ánægður með það.