Löndun ekki leyfð á Írlandi

Evrópusambandið birti á heimasíðu sinni í lok júlí í fyrra fréttatilkynningu þar sem fram kemur að framkvæmdastjórn ESB hafi greint alvarlega veikleika við vigtun á uppsjávarfiski á Írlandi.

Í kjölfar þess og þar til að úrbætur hafa náð fram að ganga mun Fiskistofa ekki veita löndunarleyfi á Írlandi, nema að sérstakt eftirlit sé viðhaft með löndun.

Vakin er athygli á þessu á heimasíðu Fiskistofu í gær, en íslensk uppsjávarskip hafa undanfarið verið við veiðar á kolmunna vestur af Írlandi.

Gátu tryggt eftirlit

Í síðustu viku var greint frá því að Huginn VE hygðist landa um 1900 tonnum af kolmunna í Kyllibegs á Írlandi. Í svari Fiskistofu við fyrirspurn um löndun Hugins segir að Huginn hafi fengið leyfi til löndunar á Írlandi á föstudaginn. Hægt hafi verið að tryggja að eftirlit væri viðhaft við löndunina í því einstaka tilviki. Fiskistofa veiti ekki löndunarleyfi á Írlandi nema sérstakt eftirlit sé viðhaft með löndun og vigtun og Fiskistofa geti ekki tryggt að svo sé alltaf.