Ævintýralegur afli Steinunnar SH

„Þetta var einstakur róður og aflinn alveg ævintýralega mikill,“ segir Brynjar Kristmundsson, skipstjóri á Ólafsvíkurbátnum Steinunni SH 167. Túrinn hjá Brynjari og áhöfn hans verður lengi í minnum hafður, en á mánudaginn komu þeir í land með alls 84,2 tonn af fiski.

Aflinn fékkst í dragnót og var að megninu til þorskur, hver fiskur gjarnan 5-7 kg og þaðan af stærri. „Ég er búinn að vera á sjó frá 1966 og skipstjóri í um fjörutíu ár og hef aldrei komið með jafn mikinn afla að landi eftir einn dag. Samt var bræluskítur á miðunum; stíf norðaustan átt og vindurinn 15 til 16 metrar á sekúndu,“ segir skipstjórinn.

Á þekktri fiskislóð

Steinunn SH var á mánudaginn á þekktri fiskislóð, Brúninni svokölluðu sem er um tvær sjómílur úti af Rifi. Þar var dragnótin sett út og í fyrsta kasti komu í hana rúm sjö tonn, en svo 35 tonn í því næsta og um 42 í því síðasta. „Auðvitað má alltaf búast við góðum afla á þessum slóðum nú þegar vertíðin stendur sem hæst. En vissulega var þetta ansi töff; menn stóðu stíft við í lestinni að blóðga fiskinn og koma í kör. Allt saman gekk þetta þó ljómandi vel og þessi dagur verður skemmtilegur í minningunni. Á þessum tíma vetrar er algengt og mjög gott að menn séu að veiða kannski 25-35 tonn svo ég nefni samanburð við þessi 84 tonnum sem við fengum nú,“ segir Brynjar.