Hafa áhyggjur af þróuninni í Evrópu
Setja bókamerki
Tengdar fréttir
Samdráttur í sjávarútvegi
Lokun veitingageirans í Evrópu vegna útbreiðslu kórónuveirunnar er talin hafa áhrif á eftirspurn eftir ferskum sjávarafurðum frá Íslandi. Ferskur fiskur er helsta framleiðsluvara smábátaeigenda og hafa þeir áhyggjur af þróun mála.
„Maður hefur áhyggjur af þessu og maður hefur heyrt í félagsmönnum sem hafa áhyggjur af þessu öllu saman – hvernig þetta þróast, hvernig menn koma vörum á markað. Við erum mest að selja ferskt,“ segir Örn Pálsson, framkvæmdastjóri Landssambands smábátaeigenda (LS), í samtali við 200 mílur.
Hann kveðst heyra að neysla sjávarafurða erlendis sé að dragast saman og það komi mest niður á ferskum fiski. Það sé þó aðeins einn angi málsins þar sem miklar áhyggjur eru af því að vinnslur verði í lamasessi verði starfsmenn settir í sóttkví.
Spurður hvort félagsmenn LS hafi ákveðið að draga úr veiðum segir Örn svo ekki vera að svo stöddu. „Ég hef ekki orðið var við það, en ég er ekki frá því að það sé fljótt að koma þegar verð fer að lækka á mörkuðum.“ Telur hann líklegt að í kjölfar slíkrar þróunar verði lagt kapp á að draga úr veiðum til þess að geta aukið sjósókn þegar verð fari hækkandi á ný.
Fram kemur í viðtali ViðskiptaMoggans við Bjarna Ármannsson, forstjóra Iceland Seafood, í dag að hann sé þegar farinn að sjá einhverjar verðlækkanir á mörkuðum ytra.
Hefur rætt um úrræði við ráðherra
Örn segir hins vegar stöðuna flókna að því leyti að veiðar eru framkvæmdar með mismunandi hætti og vísar hann til grásleppuveiðar sem nú eru að hefjast, en þær eru tímabundnar og því erfitt fyrir útgerðaraðila að bíða með þær. „Ég hef aðeins rætt við [sjávarútvegs]ráðherrann um að koma til móts við okkur, meðal annars ef það verða veikindi og annað slíkt sem stöðvar bátinn, að heimila að færa dagana. Fyrir því er heimild í lögum.“
Spurður hvort LS hafi biðlað til stjórnvalda um frekari úrræði komi til þess að ástandið fari að hafa verulegar afleiðingar fyrir afkomu greinarinnar svarar Örn: „Við höfum ekki komist svo langt í þessu, en ef þetta vindur mikið upp á sig þarf að skoða það sérstaklega í því ljósi og við þær aðstæður sem skapast.“
Þá þykir honum koma til greina að skoðað verði að rýmka til við veiðar dagróðrabáta og strandveiðar, en slíkt gæti þurft á lagabreytingum að halda til þess að hægt yrði að framkvæma.
Tengdar fréttir
Samdráttur í sjávarútvegi
J.D. Vance varaforsetaefni Trumps
Kourani áfrýjar dómnum
Bensínið kláraðist á N1 á Egilsstöðum
Lögreglustjóri gerður afturreka
Við höfum „runnið til baka niður brekkuna“
Best að skella á og hringja strax í bankann
Donald Trump: „Ég ætti að vera dáinn“
Tjón eftir úrkomumet: „Landslagið er gjörbreytt“