Hnúfubaki bjargað úr neti

Hnúfubaki sem festist í net norður af Dalvík í Eyjafirði hefur verið bjargað. Hvalaskoðunarbátur varð var við hvalinn og gerði viðvart.

Ekki er talið að dýrið hafi verið lengi fast í netinu en þó voru komin sjáanleg lítilsháttar sár af völdum netsins á stirtlu og sporð, að því er segir í tilkynningu frá Matvælastofnun.

Netið var meðal annars vafið um sporð hvalsins. Ljósmynd/Freyr Antonsson

Meðlimir viðbragðsteymis um hvali í neyð, þar sem Matvælastofnun, almannavarnadeild ríkislögreglu, Landhelgisgæsla Íslands, Umhverfisstofnun, Samband íslenskra sveitarfélaga, Háskóli Íslands og Hafrannsóknastofnun eiga fulltrúa, veittu viðbragðsaðilum á Dalvík ráðgjöf með tilliti til velferðar hvalsins og öryggis björgunaraðila við aðgerðir.

Starfsmaður hvalaskoðunarbátsins, sem einnig hefur töluverða reynslu á þessu sviði, fór ásamt björgunarsveitinni í Dalvík út á björgunarbát og skorið var á grásleppunótina þar til dýrið losnaði, samkvæmt tilkynningunni.

Hvalurinn virtist nánast leita eftir aðstoð að hans sögn og var samstarfsfús meðan á björgunaraðgerðum stóð. Dýrið virðist frískt og talið er að það nái sér fljótt eftir atvikið.

Ljósmynd/Freyr Antonsson

Viðbragsaðilar á Dalvík. Ljósmynd/Freyr Antonsson

• Blogga um frétt