Skortir gögn um týnd veiðarfæri á Norðurlöndunum

„Norðurlönd hafa ófullnægjandi yfirsýn yfir það hve mikið og hvar veiðarfæri tapast. Jafnvel þótt fyrir hendi sé regluverk með kröfum um skýrslugerð ráða fá landanna yfir virkum kerfum til skýrslugerðar um töpuð veiðarfæri við atvinnu- og tómstundaveiðar,“ segir í skýrslu sem unnin hefur verið fyrir Norrænu ráðherranefndina vegna samstarfsverkefnisins hrein norræn höf (e. Clean nordic ocean).

Þar segir að tölur um týnd veiðarfæri eru „ýmist mjög lágar eða hreinlega ekki til staðar.“ Er þetta talið óheppilegt í ljósi þess að fiskveiðar og tómstundaveiðar eru þáttur í mengun hafsins. Bent er á að Norðurlönd leggja lítið sem ekkert í að fjarlægja týnd veiðarfæri.

Dregin veiðarfæri áberandi í strandrusli

Þá sé „umtalsvert meiri hætta á því að veiðarfæri sem lögð eru tapist en þau sem dregin eru.“ Þrátt fyrir þetta eru hlutir úr veiðarfærum sem dregin eru miklu meira áberandi í strandrusli frá fiskveiðum.

Talsverðar líkur eru á því að íhlutir úr veiðarfærum og drauganet leiði til þess að særa dýr í hafi og í versta falli dauða þau, að sögn skýrsluhöfunda.

Lagt er til að veiðarfæri verði merkt til þess að hvetja þá sem þau eiga til að tilkynna það að slík týnist, einnig þarf að fjarlægja veiðarfæri sem eru á hafsbotni. Þá þarf að koma upp skilvirku móttöku kerfi og hvetja til endurvinnslu, að mati höfundanna.

Fólkið plokkaði mikið af plastrusli. Ljósmynd/Spitsbergen

• Blogga um frétt