„Liggur fyrir að einn daginn myndi þetta gerast“

„Það er bara verið að gera þetta á meðan við getum haft áhrif á það hvernig þetta verður gert, eigendurnir. Það liggur svo sem alveg fyrir að einn daginn myndi þetta gerast, en gerum það á þennan hátt sem getur tryggt rekstur fyrirtækisins í óbreyttri mynd,“ segir Þorsteinn Már Baldvinsson, forstjóri Samherja, í samtali við 200 mílur.

Samherji tilkynnti á vef sínum í dag að aðaleigendur Samherja hf., Helga Steinunn Guðmundsdóttir, Þorsteinn Már Baldvinsson, Kristján Vilhelmsson og Kolbrún Ingólfsdóttir, höfðu framselt til barna sinna 84,5% hlut í fyrirtækinu.

Þorsteinn Már segir viðskiptin hafa verið annars vegar framkvæmd með erfðagerningi, fyrirframgreiddum arfi, og hins vegar með sölu milli félaga.

Frétt af mbl.is

Hafa framselt 84,5% hlut í Samherja

Spurður hvort viðskiptin hafi miðað að því að halda Samherja sem fjölskyldufyrirtæki, segir hann svo vera. „Já, á svipaðan hátt og verið hefur.“

„Eftir 37 ár er búið að fara í gegnum mörg breytingaskeið og fyrirtækið þarf alltaf að fylgjast með og endurnýja sig, hvort sem það er inn á við eða út á við. Það þarf alltaf að aðlaga sig kaupendunum og þeim breytingum sem verða á neytendum sem eru búnar að vera gríðarlega miklar. […] Ef fyrirtækið ætlar að standa sig þá verður það að aðlagast neytendum á hverjum tíma, við framleiðum vörur fyrir ótrúlega marga og það þarf að halda áfram að þróa fyrirtækið.“

• Blogga um frétt