Nota drónakafbát við leitina

Drónakafbátur hefur verið tekinn í notkun við leit að skipverja sem talinn er hafa fallið fyrir borð af fiskiskipi á leið þess til hafnar í Vopnafirði í gær. 

Jón Sigurðsson, formaður björgunarsveitarinnar Vopna, segir að koma verði í ljós hvernig kafbáturinn reynist, en með honum sé hægt að skoða sjávarbotn á leitarsvæðinu. 

Eftirlits- og björgunarflugvél Landhelgisgæslunnar lenti á Vopnafirði um klukkan 11 í dag, og leitar úr lofti innan leitarsvæðisins. Þá eru fjörur gengnar og bátar notaðir við leitina. 

Aðstæður fyrir austan eru góðar að sögn Jóns, hægur vindur og bjart. Björgunarsveitir allt vestur frá Húsavík og suður frá Djúpavogi taka þátt í leitinni.