Kemba sama svæðið aftur og aftur

Leit að skipverja sem talið er að hafi fallið fyrir borð af fiskiskipinu Erling KE-140 í Vopnafirði stendur enn yfir. Mannsins hefur verið leitað síðan á mánudag. 

Erling KE-140 er í eigu Saltvers en Brim er með skipið á leigu. Um er að ræða netabát sem var á grálúðuveiðum, þegar maðurinn féll fyrir borð um klukkan tvö á mánudag. 

Frétt af mbl.is

Leit að sjómanninum hófst á ný í morgun

Jón Sigurðsson, formaður björgunarsveitarinnar Vopna, segir að leitin í dag hafi verið nokkuð umfangsminni en síðustu daga. Alls séu um 15 manns við leit sem stendur. 

„Björgunarsveitin Vopni heldur áfram leit í dag og á morgun í það minnsta. Síðan reiknum við með að bæta í um helgina. Leitin í gær gekk mjög vel. Það er bara alltaf sami útgangspunkturinn hjá okkur, hann afmarkar leitarsvæðið okkar.“

Jón segir að leitarsvæðið sé enn það sama. 

„Það er bara farið yfir svæðin aftur og aftur. Svæðið sem slíkt var leitað alveg í þaula í gær, með gríðarlegum mannskap. Til að útiloka að hann væri kominn upp í fjöru einhvers staðar. Við leitum í minni hópum núna og bætum síðan í að nýju um helgina, sama svæði aftur og aftur.“

Jón segir að bátar og sæþotur séu notaðar við leitina ásamt því að fjörur eru gengnar. Þá segir hann leitaraðstæður hafa versnað síðan í gær. 

„Það er mikið verra í dag en í gær. Það er hvöss austanátt, svo það brýtur hérna á hafnargarðinum á okkur núna. Dagurinn í gær var fullkomlega nýttur í góða veðrinu og svo á veðrið að skána á morgun.“

• Blogga um frétt