Stærsta flutningaskip heims kemur til Evrópu

HMM Algeciras er stærsta flutningaskip í heimi og getur flutt allt að 24 þúsund gáma í einu. Skipið hefur verið á jómfrúarsiglingu sinni fraá Kína til Evrópu og kom til hafnar í Rotterdam í Hollandi á miðvikudag og mun halda til Hamborgar í Þýskalandi á morgun, að því er fram kemur í umfjöllun Shippingwatch.

Skipið getur, eins og fyrr segir flutt allt að 24 þúsund gáma og er því stærra en fyrri heimsmetshafinn MSC Gülsün sem getur flutt 23.756 gáma.

Þegar HMM Algeciras kom til hafnar í Rotterdam var það með 19.600 gáma um borð, en skipið er í eigu skipafélagsins HMM, áður Hyundai Merchant Marine, í Suður Kóreu.

Fram kemur í umfjöllun Shippingwatch að stærð flutningaskipa hefur farið vaxandi á undanförnum áratug og eru öll stærri skipafélög með risavaxin skip í flota sínum, en slík skip þjónusta aðallega flutningaleiðir milli Kína og Evrópu.

Skip af þessari stærðargráðu lækka flutningskostnað á hvern gám og eru umhverfisvænni. Hins vegar skapa þau mikla erfiðleika fyrir hafnir sem taka við þeim.

• Blogga um frétt