Áfall að stofninn sé ekki að vaxa

„Þetta voru vonbrigði. Ég að vísu óttaðist það fyrir fundinn að það myndi verða eitthvert bakslag í þorskinum, en ég átti ekki von á því að það yrðu tæp 6%,“ segir Örn Pálsson, framkvæmdastjóri Landssambands smábátaeigenda, í samtali við 200 mílur, inntur álits á veiðiráðgjöf Hafrannsóknastofnunar sem kynnt var í morgun.

Frétt af mbl.is

Lækka ráðgjöf í þorski um 6%

Fram kom í kynningu stofnunarinnar að það vanti stóra árganga í þorskinn og kveðst Örn hafa áhyggjur af stöðu þorskstofnsins. „Mér sýnist að veiðistofninn hafi gefið verulega eftir, þannig að við gætum búist við því að þetta sé fyrsta skrefið í að þetta fari áfram niður á við í þorskinum. Og hann er það sem skiptir mestu máli.

Það er áfall að við sjáum ekki stofninn í stöðugum vexti þegar búið er að veiða eftir þessari aflareglu og aflinn hefur alltaf verið undir leyfilegum heildarafla undanfarin ár. Þetta kallar væntanlega á frekari skoðanir, meðal annars að skoða rallið hvort það hafi verið eitthvað óvanalegt miðað við fyrri ár,“ bætir hann við.

Milljarðar í húfi

Verði farið að ráðgjöf Hafrannsóknastofnunar verður gefið út aflamark fyrir næsta fiskveiðiár (2020/2021) sem nemur 256.593 tonnum af þorski og er það tæplega 16 þúsund tonnum minna en á yfirstandandi fiskveiðiári. Aflaverðmæti skerðingarinnar nemur um sex milljörðum króna miðað við meðalverð á innlendum fiskmörkuðum í gær og segir Örn að um sé að ræða mun stærri upphæð þegar litið er til útflutningsverðmæta. „Þetta er ekkert smá magn og getur verið um níu til tíu milljarðar í útflutningstekjum.“

Hann segir að á móti lækkuninni í þorski komi hækkun í ráðlögðu aflamarki í ýsu sem nemur 9% og steinbít sem nemur 5%. „En síðan er lækkun í flestum öðrum tegundum og það er áhyggjuefni.“

• Blogga um frétt