Sækja fram á erlendum mörkuðum

Íslandsstofa mun fara með umsjón með vörumerkjunum Icelandic og Icelandic Seafood frá og með 1. júlí í samræmi við ákvörðun sem tekin var þegar Framtakssjóður Íslands afhenti ríkissjóði vörumerkin árið 2018 til varðveislu og nýtingar í þágu íslensku þjóðarinnar. Þetta kemur fram í tilkynningu Íslandsstofu. 

Samkvæmt samkomulaginu mun Íslandsstofa hafa umsjón með vörumerkjunum, þar með talið ábyrgð á kynningu og umsjón með lögformlegri verndun vörumerkjanna. Þá hefur verið gengið frá rammasamningi við íslensk dótturfélög Brims í Asíu sem starfa í Japan, Hong Kong og Kína.

Sala hafin á Amazon

Umrædd félög hafa gengið undir nafninu Icelandic og hyggjast nýta vörumerkin Icelandic við sölu og markaðssetningu hágæða sjávarafurða sem framleiddar verða úr íslensku hráefni í samstarfi við íslensk sjávarútvegsfyrirtæki.  

Þá hefur einnig nýlega verið gengið frá samningi við dreifingaraðilann Greenwood Group í Bandaríkjunum um sölu á fiskolíum undir nafninu Icelandic Wild Fish Oil.  Salan á þeim er hafin á Amazon og dreifing er hafin til smásöluaðila. Framleiðandi olíanna er SagaNatura. Nánari útfærsla samstarfs aðila er háð undirritun endanlegs samnings. 

„Sterk vörumerki skipta vaxandi máli í alþjóðlegri markaðssetningu. Árangursríkir samningar um notkun Icelandic-vörumerkisins hafa legið fyrir um árabil við High Liner Foods í Norður-Ameríku. Iceland Seafood og Ibérica á Spáni og S-Evrópu nýta einnig vörumerkið. Vörumerkið hefur nýst vel á mörkuðum í Norður-Ameríku og Suður-Evrópu, en á þó enn talsvert inni. Sala á fiskolíu í neytendaumbúðum til verslana undir merkjum Icelandic og sala á sjávarfangi í Asíu undir merkjum Icelandic eru merk tímamót,“ er haft eftir Þorkeli Sigurlaugssyni, stjórnarformanni Icelandic. 

• Blogga um frétt