Unnið að viðhaldi á Gullver

Unnið hefur verið að viðhaldi og breytingum á Gullver NS síðan í lok júní þegar skipið landaði síðast á Seyðisfirði. Ráðgert er að þeim ljúki fyrir lok mánaðarins og skipið haldi á ný til veiða 29. júlí.

Á vefsíðu Síldarvinnslunnar segir að aðalvél skipsins verði tekin upp, en það er Framtak sem sér um það verk. Þá er unnið að stækkun stakkageymslunnar og verður ný krapavél sett í skipið sem mun leysa af hólmi tvær skelísvélar sem voru fyrir.

Slíkar krapavélar eru í skipunum Vestmannaey og Bergey og segir á vef Síldarvinnslunnar að góð reynsla sé af þeim. Hafði það áhrif á ákvörðunina um að koma slíkum vélum upp í Gullver, en talið er að krapinn tryggi betri kælingu á aflanum, auk þess að létta vinnu í lestinni.  

Gullver NS landaði síðast á Seyðisfirði 24. júní sl. Síðan hefur verið unnið að viðhaldi og breytingum á skipinu í heimahöfn og er ráðgert að hann haldi á ný til veiða 29. júlí nk. Sumarlokun er hjá frystihúsinu á Seyðisfirði og er þá tækifærið nýtt til að vinna við skipið.

Haft er eftir Karli Jóhanni Birgisson, rekstrarstjóra útgerðarsviðs Síldarvinnslunnar, að framkvæmdir gangi samkvæmt áætlun.

• Blogga um frétt