„Mér fannst bara gaman að vinna í fiskinum“
Setja bókamerki
Hólmfríður Runólfsdóttir ákvað að leggja frá sér svuntuna og hætta störfum í fiskvinnslu Fisk Seafood á Sauðárkróki í síðasta mánuði. Þykir það saga til næsta bæjar að hún hafi með þessu bundið enda á 50 ára feril í fiskvinnslu, þar af 27 ár fyrir Fisk Seafood.
„Mér fannst alltaf gaman að vinna þarna,“ segir Hólmfríður í samtali við 200 mílur og segist ætla að lita reglulega við á gamla vinnustaðnum enda með miklar taugar til hans.
Spurð hvort hún hafi séð miklar breytingar á þeim tíma sem hún hafi unnið við fiskvinnslu, segir hún svo vera en bendir á að ekki hafi verið mikið um skurðvélar þar sem hún hefur unnið. „Þetta voru heilfryst flök og þau voru bara söguð í bita. Hér áður fyrr var þetta bara pakkað beinhreinsað og roðflett, en núna er þetta með roði og án. Það er sprautusaltað núna það sem er með roði og svo er núna lausfryst, þetta var sett á pönnur hér áður fyrr.“
Mikil samheldni
„Þetta var mjög gott fólk sem maður vann með. Sérstaklega á pökkunarstöðinni, þegar maður var þar. Kom þangað ’94 eða ’95. Þar pökkuðum við í kílóapakkningar og þar var sagað í tvö til þrjú hundruð gramma bita,“ segir hún.
Spurð hvort það þurfi sérstaka skapgerð til þess að endast 50 ár í fiskvinnslu, svarar Hólmfríður: „Ég veit það ekki mér fannst bara gaman að vinna í fiskinum. Ég býst við að það væri alveg sama hvað maður hefði gert, það hefði alltaf verið gaman.“
Hún segir ávallt vera gaman í kringum sig og hlær. „Sérstaklega í kringum ’80 til ’90, þá var þetta bara eins og að vera heima hjá sér. Þegar einn hló að einhverjum brandara þá hló allur salurinn og vissu allir af hverju væri verið að hlægja,“ útskýrir hún og bætir við að það hafi verið mikil samheldni meðal samstarfsmanna.
Sérstaklega gaman að vinna með unglingum
Hún segir ungmennin sem hafa verið að koma ný inn í vinnsluna standa sig vel. „Það er náttúrulega munur á því hvort unglingar tengjast sveit. Það þarf ekki að sýna þeim mikið hvernig á að gera hluti, þau yfirleitt kunna að vinna. Það var mjög gaman að kenna þeim vinnubrögðin.“
Hún segist ekkert hafa þurft að vera harðhent við ungmennin sem hún var að kenna. „Nei nei. Það er mjög gaman að vinna með unglingum, alveg sérstaklega.“
Hver var hvati Crooks?
Sprenging í Leifsstöð: Einn lítið slasaður
Uppgjöf gagnvart neyðarástandi: Afdrifarík mistök
Segja KÍ hafa leitt skólakerfið í öngstræti
Staðfestir ótrúlega yfirburði sína
„Þær bara krassa og fara ekkert í gang aftur“
Trump talaði fyrir sameiningu í landinu
Vatn í tankskipum