Arctic Fish var rekið með liðlega 40 milljóna króna hagnaði fyrstu sex mánuði ársins. Kemur það fram í fjárfestakynningu vegna hálfsársuppgjörs Norway Royal Salmon (NRS) sem er stærsti eigandi að vestfirska fiskeldisfyrirtækinu.

Arctic Fish hefur verið í uppbyggingarferli í níu ár og er þetta í fyrsta skipti sem uppgjör sýnir hagnað. Árið er að vísu ekki búið og ljóst að kórónuveiran hefur áhrif á afkomu fyrirtækisins á seinni hluta ársins.

NRS á helming hlutafjár í Arctic Fish og sér samstæðan tækifæri til vaxtar á Íslandi. Áætlað er að eigin framleiðsla NRS í Noregi verði í ár 35 þúsund tonn og heildarframleiðsla Arctic Fish 8.200 tonn. Hefur framleiðslan á Íslandi því veruleg áhrif á samstæðuna enda telst Norway Royal Salmon ekki til fiskeldisrisanna í Noregi. Arctic Fish er í vexti og segir Sigurður Pétursson, framkvæmdastjóri hjá félaginu, að stefnt sé að því að Arctic nái sömu stærð og NRS á næstu árum, þegar það hefur fengið þau framleiðsluleyfi sem sótt hefur verið um.

Umhverfismati fyrir stækkun í Dýrafirði er lokið sem og mati vegna eldis í Arnarfirði og er beðið starfs- og rekstrarleyfa. Nýja seiðaeldisstöðin í Tálknafirði, sú tæknilega fullkomnasta hér á landi, skapar góðan grunn fyrir vöxt hjá Arctic Fish, að því er fram kemur í umfjöllun um þessi mál í Morgunblaðinu í dag.

Tengdar fréttir

Fiskeldi

Gagnrýna upptöku eldisgjalds

• Atvinnutekjur í fiskeldi 957 þúsund
• „Þetta er óásættanleg staða“
• Hafa opnað eldið upp á gátt
• Brennihveljur geta verið langvarandi vandamál

» Fleiri tengdar fréttir